Minister chuan, Dan ang ngeia fa lak chu naupang leh nu leh pate tana himna a nih thu a sawi. Lalrinpuii chuan dan ang taka fa lak a nih ngei theih nana hma an lo lak tawhna chu fakin tan la zel turin a fuih a. Dan ang taka fa lak chu naupang leh a latu, nu leh pa te tan nakin zelah pawh a him thu sawiin hemi chungchang hi midangte hrilhhretu leh zirtirtu a lo tang zel turin kalkhawmte chu a ngen a ni.

Sawrkarin awlsam zawka thil kalpui a nih theih nana hma a lakna- ease of doing business hi fa lak (adoption) kalphungah pawh kalpui chi a ni em tih lo sawi hova lo ngaihtuah ho turin a chah bawk. Adopt ngaia naupang siam thintu lian tak, nupa inthenna leh chhungkaw kehchhia hi tih tlem dan tur ngaihtuah hova naupang tana tuarna rapthlak zia lo inhrilhhria a, awareness nasa taka lo kalpui thin turin kalkhawmte chu a chah nghal bawk a ni.

Minister chuan adoption mai bakah hian naupang enkawl leh venhimna mamawhte tan inenkawl lailawkna hmun - Foster care a awm thu sawiin hei hi naupangte tan Home-a seilian lova chhungkaw enkawlna an dawn theihna hmun a nih thu a sawi a. Mizo mipuite hian intihhmuh nachang kan hriat a tul thu sawiin tunah pawh hian nu leh pa engemaw zatin harsatna nei lovin an foster mek thu a sawi a ni.

Mizoramah hian Fa lak chungchang buaipuitu District Magistrate (DM), District Child Protection Unit (DCPU) leh Child Welfare Committee (CWC) te chu District tinah pakhat theuh awmin Specialised Adoption Agency (SAA) 13 leh Chief Medical Officer (CMO) 12 an awm a. Hei bakah hian State Adoption Resource Agency (SARA) pakhat a awm bawk a ni.

Kum 2005 atanga August 2025 thleng khan dan ang taka fa lak (adopted children) 572 awm tawhin tun dinhmunah adoption nghak mek nu leh pa 36 an awm a. Dan ang taka fa lak theih (Legally Free) 19 awm mekin dan anga lak theih tura buaipui mek 11 an awm a ni.

He training hi Adoption Functionaries te puala buatsaih a nih angin, District tin District Magistrate (DM), Chief Medical Officer (CMO), State Adoption Resource Agency (SARA), District Child Protection Unit (DCPU), Child Welfare Comnittee (CwC), Specialised Adoption Agency (SAA) leh Children's Home aiawh te an tel a.

Lalzarmawii, Commissioner & Secretary, SW, W&CDD chuan kalkhawmte lawmna thu sawiin inhmelhriat tirna hun a hmang a. Sailopari, Joint Director,.Women and Child Development chuan he programme in a tum leh buatsaih a nih chhante sawifiahna hun a hmang a, mithiam bikte pawhin hun an hmang bawk.